( كات تڕێن )

( كات تڕێن )

_{هۆحه‌! شه‌وه‌!!! وه‌ره‌ ئه‌ولا وه‌ر! ده‌لاچوو!!! چیرۆكی مێژووی سه‌رهه‌ڵدانی كاتژمێرم نووسیبوو، ده‌ی؟! ده‌ی له‌گه‌ڵ ده‌فته‌ره‌كه‌م بزرم كرد، ئێستا؟! ئێستا تاقه‌تی ئه‌وه‌م نییه‌ به‌و شێر و رێوییه‌ی هه‌وڵێ بیگێڕمه‌وه‌، ئه‌یچۆن؟! ئه‌یچۆنی بۆ چییه‌، ئاوا:
داینێ شه‌ڕه‌. ئه‌وه‌ش شه‌ڕ. شه‌ڕه‌كه‌ له‌نێوان دووسووپای به‌هێزه‌. با به‌هێز بن. پاڵه‌وانێك له‌مبه‌ر و پاڵه‌وانێكیش له‌وبه‌ر. چی؟ هاتنه‌ مه‌یدان؟ ئا. ده‌هۆڵچی شه‌ڕ رمبه‌ی یه‌كه‌می له‌ ده‌هۆڵه‌كه‌ی هه‌ستاند. ئه‌وه‌یه‌ك. گوێی له‌ ده‌نگی ترپه‌ی دڵی هه‌ردووك پاڵه‌وانه‌كه‌ ده‌بوو. ئه‌وه‌نده‌ ترسابوون؟ نا ده‌هۆڵچی گوێی سووك بوو. ئه‌وه‌ له‌گه‌ڵ ئه‌ودرۆیه‌شمان كرد. رمبه‌ی دووهه‌میشی له‌ ده‌هۆڵه‌كه‌ هه‌ستاند. ئه‌وه‌ش دوو. ده‌هۆڵچی گوێی له‌ ترپه‌ی چواره‌می دڵی پاڵه‌وانه‌كان بوو. باشه‌ ئه‌م درۆیه‌ به‌س دووباره‌ بكه‌وه‌. رمبه‌ی پێنجه‌میشی له‌ ده‌هۆڵه‌كه‌ هه‌ستاند. ئه‌رێ ئه‌وه‌ كه‌ی ئه‌و شه‌ڕه‌ ده‌ست پێ ده‌كا؟ ته‌پڵچی تا گوێی له‌ ده‌نگی زه‌ربه‌ی دڵی دووپاڵه‌وانه‌كه‌ نه‌بوایه‌ رمبه‌یكه‌ی نه‌ده‌كوتا. بوو به‌چه‌ند رمبه‌؟ شه‌ش! رمبه‌ی حه‌وته‌میشی هه‌ستاند. ده‌ی. پاڵه‌وانه‌كان چاویان له‌چاوی یه‌كتر بوو. ده‌ی با ده‌ست پێ بكه‌ن! رمبه‌ی هه‌شته‌میش به‌رزبۆوه‌. هه‌ی هوو! رمبه‌ی نۆهه‌میش. پفففففف! ده‌نگی هاوكاتی زه‌ربه‌ی دڵی ئه‌و دووپاڵه‌وانه‌ و رمبه‌ی ده‌هه‌م وه‌خته‌بوو مێشكی سه‌ری ده‌هۆڵچی بته‌قێنێ. له‌و درۆیه‌! رمبه‌ی یازده‌هه‌م، رمبه‌ی دوازده‌هه‌م، چوارده‌هه‌م، شازده‌هه‌م، حه‌ڤده‌، 18، 19، 20، 21، 22، 23، 24، 25، 26، 27، هاوكات له‌گه‌ڵ رمبه‌ی بیست و هه‌شته‌م یه‌كی هه‌نگاوێكی دیكه‌ لێك چوونه‌ پێشێ. رمبه‌ی 29 هه‌م، 30هه‌م، 31، 32، 33، زه‌ربه‌ی دڵیان ئه‌وه‌نده‌ خاو و ئارام بوو، ده‌تگوت هاتوون بۆ ئاشتی، رمبه‌ی 34، رمبه‌ی.. شااااااااااااااباااااااااابه‌!؟
رمبه‌ی 35، 36، 37، 38، 39، بێ ده‌نی و ئارامی تفی له‌ قوڕگی هه‌مواندا وشك كردبوو. ئا..خ! كه‌ی ده‌ست پێ ده‌كه‌ن؟! رمبه‌ی 40، 41، 42، ورده‌ ورده‌ ده‌نگی هه‌ناسه‌كان كزتر و خه‌فه‌تر دێنه‌ گوێ، 43، كه‌متر و كه‌متر، 44، ده‌كرێ ئه‌م چركه‌ساته‌ ناوبنێین: چركه‌ساتی به‌ره‌و مه‌رگی ده‌نگ. 45، 46، 47، 48، 49، 50، 51، 52، هه‌موو ده‌نگێك مرد جگه‌ له‌ده‌نگی رمبه‌ی ده‌هۆڵچی، 53، 54، 55، 56، 57، رمبه‌ی په‌نجاو هه‌شت و له‌لێدان راوه‌ستانی دڵی شه‌ڕكه‌ره‌كانی ئه‌مبه‌ر و ئه‌وبه‌ر له‌ چاوه‌ڕوانی پاڵه‌وانه‌كانیان یه‌كێك بوو، ده‌هۆڵچی رمبه‌ی په‌نجا و نۆی لێدا و ده‌نگی ده‌هۆڵ و چوونه‌وه‌سه‌ره‌وه‌ی ده‌ستی بۆ زه‌ربه‌ی نوێ و راوه‌ستانی دڵی یه‌كێك بوون. ئه‌وه‌م پێخۆش بوو!
له‌پڕ له‌ دوور دووره‌وه‌ له‌ دواو دواوه‌ شه‌ڕكه‌رێكی سووپای ئه‌مبه‌ر لێی به‌ربوو، لێ به‌ربوون و زه‌ربه‌ی شه‌ست و قاقای پێكه‌نینی دووپاڵه‌وانی به‌رابمه‌ریه‌ك و وه‌كار كه‌وتنه‌وه‌ی دڵی شه‌ركه‌ره‌كانی هه‌ردووك لا و له‌ پێكه‌نینا خۆ له‌خۆڵه‌وه‌ گه‌وزانی ته‌پڵچی و ئه‌وانی تر یه‌كێك بوو.
له‌و رۆژه‌وه‌ مرۆگی خۆماڵی ساعه‌تی كردۆته‌ شه‌ست چركه‌ی (زه‌ربه‌ی)  دڵی پاڵه‌وانی و شه‌ست خوله‌كی (تڕی) پاڵه‌وانی و كات ژمێر ( كات تڕێن )  داهێنرا...}

ئه‌گه‌ر وێبلاگێکم هه‌بوو ئه‌مانه‌م له‌وێ داده‌نا

جاری وایه له که‌له‌که‌‌م ده‌دا ده‌ست پێده‌که‌م به نووسی بیره‌وه‌ریه‌کانم. لای خۆم وا داده‌نێم هاتوو له‌خۆوه گرتی‌و بوومه که‌سایه‌تیه‌کی گرینگ. له‌ وه‌ختی وا دا ده‌بێ شتێکت بۆ گوتن پێ هه‌بێ. خه‌ڵک چاویان لێته کتێب و شتیان بۆ بنووسی. ده‌بێ لانی که‌م سێ سه‌د لاپه‌ڕه ته‌وزیح بده‌ی چۆن بوویته که‌سایه‌تیه‌کی گرینگ. ئه‌گه‌ر هه‌ر ئێستا بینووسم چاکییه‌که‌ی ئه‌وه‌یه وه‌ختێک بووم به که‌سایه‌تیه‌کی گرینگ، پێویست ناکا خۆم ماندوو بکه‌م. لاقم له‌ سه‌ر لاقم داده‌نێم و شووتی ده‌خۆم.

  *******************

نزیک به ساعه‌تێکه ژن و مێردێکی هاوسامان کردوویانه‌ته‌ شه‌ڕوو هه‌را. وه‌ک ره‌گبار جنێو به‌ یه‌کتر ده‌ده‌ن. سه‌یر ئه‌وه‌یه هه‌ر دووکیان ده‌نه‌ڕێنن "فاک! فاک! بیبڕه‌وه. دمت داخه!" وادیاره هه‌ر گوێ ناده‌نه ده‌قی جنێوه‌کانیان. خه‌ریکه لێیان وه‌ڕه‌ز ده‌به‌م. تا ئێستا هیچ ئاماژه‌یه‌ک به‌وه نه‌کردوه له‌سه‌رچی شه‌ڕیانه تا منیش شتێکم لێ حاڵی بێ. هه‌روا بڕواته پێشێ منیش مه‌جبوور ده‌بم د‌مم بکه‌مه‌وه. هێ! هێ! هه‌ر ئێستا‌ تاکه‌وشێک له په‌نجێره‌که‌م که‌وت! "فاک!"

   ********************

من ئه‌گه‌ر له جیاتی ئه‌و سه‌گه گه‌ورانه بوایه‌تم قه‌ت بۆنم به قوونی ئه‌و سه‌گه چکۆلانه‌وه نه‌ده‌کرد.  حه‌قیقه‌تی جاری وایه هه‌ر له سه‌گ بوونیشیان دڕدۆنگم. ده‌عبای وا دێنن ده‌یگێڕن به عینوانی سه‌گ که هیچ فڕی به توخمی سه‌گه‌وه نیه. من ئه‌گه‌ر سه‌گێکی گه‌وره بوایه‌تم، حه‌تمه‌ن ده‌بوومه سه‌گێکی ره‌گه‌زپه‌ره‌ست. پێم وانیه ره‌گه‌زپه‌ره‌ستی بۆ حه‌یوانه‌کان ئیرادێکی بێ. بێ‌شک ئه‌وان ده‌توانن هه‌موو هه‌ڵوێستێکیان هه‌بێ.

********************

چاوه‌ڕوانم ئه‌و ده‌ست پێبکا. به‌سته‌زمان و بێده‌نگ دانیشتووم و سه‌رم داخستوه. ئاخری ده‌ڵێ ‌ده‌ی بچینه سه‌ر باسی کاری تێزه‌که‌ت. ئه‌و به‌ینه چیت کردوه؟ شتێکی تازه‌ت پێیه؟ نازانم بڵێم چی. ده‌بوایه پێشتر بیانوویه‌کی ماقووڵم ئاماده‌ کردبا. سوورسوور ده‌مزانی ئه‌وه‌م لێده‌پرسێ. عه‌جه‌ب گه‌وجێکم منیش.  دوایی ساتێک بێد‌ه‌نگی له پڕدا ده‌ڵێم حه‌قیقه‌تی ئه‌و ماوه‌یه به‌خاتری هه‌لوومه‌رجی ئاڵۆزی ناو ئێران دوای هه‌ڵبژاردنی سه‌رۆک کۆمار نه‌متوانیه چاک له‌سه‌ر کار فوکوسم هه‌بێ و هه‌میشه په‌رۆشی بنه‌ماڵه و ره‌فێقه‌کانم له ئێران هه‌یه و ته‌نانه‌ت چه‌ند شه‌و نه‌متوانیوه  له نیگه‌رانی بخه‌وم! دوای ته‌واو بوونی نوتقه‌ دڵته‌زێنه‌که‌م سه‌رێک به نیشانه‌ی ته‌سدیق ته‌کان ده‌دا و ده‌ڵێ  وایه، وایه تێده‌گه‌م. منیش جاروبار هه‌واڵه‌کانی ده‌خوێنمه‌وه. ئێستاش ئیدامه‌ی هه‌یه؟ به‌ڵێ! به‌ڵێ! له‌وه‌ناچێ به‌وزوانه بکووژێته‌وه. هه‌ڵبه‌ت ئێمه هه‌موو هۆمێدمان هه‌یه بزووتنه‌وه‌ی سه‌وز زوو سه‌رکه‌وێ. ئه‌مجار که هه‌ندێک ترسم شکاوه‌ له‌به‌رئه‌وه‌ی هه‌ستی ئه‌رکناسی خۆم نیشان بده‌م ده‌ست ده‌که‌م به لۆمه‌ کردنی خۆم و ده‌ڵێم که به‌داخه‌وه نه‌متوانیوه باڵانس بده‌م به کاره‌که‌م و ده‌بێ فوکوسم زۆرتر هه‌بێ و حه‌تمه‌ن وا ده‌که‌م و له‌و ‌قسانه. دیسان ته‌سدیقی ده‌کا و ده‌ڵێ، ئۆکه‌ی، ئۆکه‌ی، من ئێستا ده‌بێ بڕۆم منداڵه‌که‌م له مه‌دره‌سه بێنمه‌وه. به‌یانی وه‌ره دوباره بتبینم. وادیاره نه‌جاتم بوو ئه‌مجاریش. مه‌منوون بزووتنه‌وه‌ی سه‌وز، مه‌منوون.

*********************

(ئێدی) ده‌ڵێ ژنێکی ئاشنای ئێمه ئه‌ده‌بیات له ده‌بیرستان ده‌ڵێته‌وه. ده‌ڵێ لای من باسی کردوه  وادیاره ده‌ پازده خوێندکاری کوردیشیان هه‌یه. ده‌ڵێ  وه‌ره له‌گه‌ڵی رێکده‌خه‌م جه‌له‌سه‌یه‌کیان بۆدانێ باسی شیعر و ئه‌ده‌بی کوردیان بۆ بکه‌. ده‌زانی چ ده‌که‌ی! ده‌توانی چه‌ند شیعری چاک هه‌ڵبژێری و بۆیان بخوێنیه‌وه. پێی ده‌ڵێم من شیعری چاکم پێ شک نایه. سه‌ره‌ڕای ئه‌وه‌ش پێم وانیه ئه‌و منداڵانه کوردیش بزانن. دوایی هه‌ردووکامان بێده‌نگ ده‌بین. دوای ماوه‌یه‌ک ده‌پرسم ژنه‌که چی؟ جه‌حێڵه؟

*********************

دوو ده‌قه‌ی پێناچێ ده‌که‌ومه هه‌ناسکه هه‌ناسک. سه‌رم له گێژه‌وه دێ. راده‌وه‌ستم و به حه‌ره‌که‌تی ده‌ست (ئێدی) تێده‌گه‌یێنم که پشوویه‌ک بده‌ین. قه‌ڵس بوه ده‌ڵێ دوو ده‌قه‌ش نه‌بوه! ده‌ڵێم ده‌بێ جگه‌ره‌یه‌ک بکێشم. چی!؟ نا، نا لێره نا. وه‌ره بڕۆین ئه‌وان زۆر وه‌پێش که‌وتوون. لێانگه‌ڕێ با زوو بگه‌نێ. هه‌مووی بۆخۆیان! وه‌ره، و‌ه‌ره دانیشین لای ئه‌و ئاوه زۆر خۆشه. رازی ده‌که‌م  داده‌نیشین. حه‌قیقه‌تی لای ئا‌وه‌که‌شم پێ خۆش نیه. پێم خۆشه هه‌ر ئێستا بڕۆمه‌وه بۆ ناو شار. بۆ ناو خه‌ڵک و ماشێنه‌کان و هه‌رچی دار و سه‌وزایی پێوه‌ نیه. داره‌کان وه‌ڕه‌زم ده‌که‌ن. ئه‌و هه‌موو داره چ لێ بکه‌م. ئه‌سڵه‌ن من چ کارێکم هه‌یه له‌سه‌ر ئه‌و نوچکی کێوه‌. هه‌سته ئێدی! وه‌ره بگه‌ڕێنه‌وه. وه‌ره من له ماڵێ بوتڵێکی ویسکیم هه‌یه. وه‌ره به‌یه‌که‌وه‌ ده‌یخۆینه‌وه. ئێدی له‌گه‌ڵم نایه. هه‌ڵده‌ستێ ده‌ڕوا. ده‌ڵێ موبایله‌که‌ت رۆشن بێ هاتینه خوارێ زه‌نگت بۆ لێده‌ده‌م. هیوادارم زووتر بگه‌نه سه‌ر نوچکی کێوه‌که.  

جۆره‌کانی....

بۆ حافره‌ت و بۆ مندا‌ڵ بڤه‌یه!

.................................

ادامه نوشته